12/08/2026
सात दिन, दस चलचित्र : ‘ओल्ड इज गोल्ड’ ले देखायो— पुरानो नेपाली सिनेमाका दर्शक अझै छन्
चलचित्र विकास बोर्डद्वारा आयोजित ऐतिहासिक नेपाली चलचित्र प्रदर्शन शृंखला ‘ओल्ड इज गोल्ड’ आज ‘जीवनरेखा’को प्रदर्शनसँगै भव्य रूपमा सम्पन्न भएको छ।
सात दिनसम्म नेपाली चलचित्र इतिहासका ‘आमा’, ‘सिन्दूर’, ‘परिवर्तन’, ‘के घर के डेरा’, ‘मनको बाँध’, ‘कुमारी’, ‘शान्तिदीप’, ‘हिजो आज भोलि’, ‘बदलिँदो आकाश’ र ‘जीवनरेखा’ गरी दस ऐतिहासिक चलचित्र ठूलो पर्दामा प्रदर्शन गरिए। दर्शकको उत्साह पहिलो दिनदेखि अन्तिम दिनसम्म निरन्तर रह्यो र अधिकांश शोमा हल खचाखच भरिए।
समापन समारोहलाई अझ विशेष बनायो— नेपाली चलचित्रका अग्रज पुस्ताले नयाँ पुस्तालाई खादा लगाएर दिएको आशीर्वादले।
चलचित्र ‘गौँथली’का कलाकार तथा चलचित्रकर्मीलाई अग्रजहरूले आशीर्वाद र सफलताको शुभकामना प्रदान गर्नुभयो।
नेपाली चलचित्रकी प्रथम अभिनेत्री भुवन चन्दले अभिनेत्री सिम्रन खड्कालाई, वरिष्ठ अभिनेता शिव श्रेष्ठले अभिनेता अरुण क्षेत्रीलाई, निर्देशक लक्ष्मीनाथ शर्माले निर्देशक डा. कपिल रिजाललाई, वरिष्ठ कलाकार टिका पहारीले निर्माता सुमन गिरीलाई तथा वरिष्ठ कलाकार सन्तोष पन्तले वितरक करण क्रेजीलाई खादा लगाएर आशीर्वाद दिनुभयो।
समापन कार्यक्रममा शिव श्रेष्ठ, सन्तोष पन्त, हरिहर शर्मा, शकुन्तला शर्मा, टिका पहारी, सुष्मा शाही, लक्ष्मीनाथ शर्मा, प्रभा ढकाललगायत अग्रज तथा विशिष्ट चलचित्रकर्मीको उल्लेख्य उपस्थिति रहेको थियो।
सुरुवातमा अग्रजहरूले दीप प्रज्वलन गरे, समापनमा नयाँ पुस्तालाई आशीर्वाद दिए।
यही दृश्यले ‘ओल्ड इज गोल्ड’लाई केवल पुराना चलचित्रको प्रदर्शन होइन, नेपाली चलचित्रको इतिहास, वर्तमान र भविष्यलाई एउटै थलोमा जोड्ने उत्सव बनाइदियो।
सात दिनअघि एउटा प्रश्न थियो—
पुराना नेपाली चलचित्र हेर्न दर्शक आउलान् त?
सात दिनपछि भरिएका हलहरूले जवाफ दिएका छन्—
दर्शक अझै छन्, चाहिएको केवल उनीहरूलाई इतिहाससँग फेरि भेटाउने अवसर हो।
#चलचित्रविकासबोर्ड #नेपालीचलचित्र
