16/05/2026
🌏 ရာသီချိန်ခါ သတင်းလွှာ (16.5.2026 - 22.5.2026)
🍀 စိုက်ပျိုးရေးအကျိုးပြု အပတ်စဥ် မိုးလေဝသ သတင်းစဉ်
အားကောင်းသော လေဖိအားနည်းရပ်ဝန်းအခြေအနေ
ဘင်္ဂလားပင်လယ်အော် အနောက်တောင်ပိုင်းနဲ့ ဆက်စပ်လျက်ရှိတဲ့ ဘင်္ဂလားပင်လယ်အော် အနောက်အလယ်ပိုင်းတို့မှာ ဖြစ်ပေါ်နေတဲ့ လေဖိအားနည်းရပ်ဝန်းဟာ အားကောင်းသော အခြေအနေမှာ ဆက်လက် တည်ရှိနေပါတယ်။ ကပ္ပလီပင်လယ်ပြင်နဲ့ ဘင်္ဂလားပင်လယ်အော်မှာ လေဖိအားနည်းရပ်ဝန်း နှစ်ကြိမ် ဖြစ်ပေါ်နိုင်ဖွယ်ရှိပြီး တစ်ကြိမ်ကတော့ မုန်တိုင်းငယ် အဆင့်ကို အားကောင်းလာနိုင်တယ်လို့ မိုး/ဇလ က ထုတ်ပြန်ထားပါတယ်။ ဒါကြောင့် လက်ရှိ အားကောင်းနေတဲ့ လေဖိအားနည်းရပ်ဝန်းဟာ မုန်တိုင်းငယအဆင့်ကို အားကောင်းလာနိုင်တဲ့ အခြေအနေ ရှိ မရှိ မိုးလေဝသ ပညာရှင်များက စောင့်ကြည့်လျက်ရှိပါတယ်။ ယခု ရက်သတ္တပတ်အတွင်းမှာတော့ အနောက်တောင်မုတ်သုံလေဟာ မြန်မာနိုင်ငံ တောင်ပိုင်းဒေသများနဲ့ မြစ်ဝကျွန်းပေါ်ဒေသကို ဝင်ရောက်လာတော့မှာပဲ ဖြစ်ပါတယ်။
မိုးကြိုကာလ မိုးလေဝသ
လက်ရှိ မေလလယ် မိုးကြိုကာလ အနောက်တောင်မုတ်သုံလေ ဝင်ရောက်လာတော့မဲ့ အချိန်မှာ လေထု မငြိမ်သက်မှုတွေနဲ့ နေ့အပူချိန်မြင့်တက်ခဲ့ရာကနေ အပူပျံတက်တိမ်များ ဖြစ်ထွန်းပြီး မွန်းလွဲပိုင်းနဲ့ ညနေပိုင်းတွေမှာ မိုးတိမ်တောင်များ ဖြစ်ထွန်းခြင်းတို့ကြောင့် လေပြင်းများ တိုက်ခတ်ခြင်း၊ လေပြင်းတိုက်ခတ်ခြင်းတို့နဲ့အတူ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်း၊ မိုးသီးကြွေခြင်းနဲ့ နေရာကွက်ကျား မိုးထစ်ချုန်းရွာခြင်းတို့ ဖြစ်ပေါ်စေနိုင်ပါတယ်။
မြောက်ပိုင်းနဲ့ အလယ်ပိုင်းမှာ နေရာကျဲကျဲ မိုးတွေရွာမယ်
ကချင်ပြည်နယ်၊ စစ်ကိုင်းတိုင်းအောက်ပိုင်း၊ ချင်းပြည်နယ်၊ မန္တလေးတိုင်း၊ မကွေးတိုင်းတို့မှာ နေရာကျဲကျဲ မိုးထစ်ချုန်းရွာပါမယ်။
နေရာအနှံ့အပြား မိုးရွာနိုင်တဲ့ ဒေသတွေ
စစ်ကိုင်းတိုင်းအထက်ပိုင်း၊ ရှမ်းပြည်နယ်၊ ရခိုင်ပြည်နယ်၊ ကယားပြည်နယ်၊ ရန်ကုန်တိုင်း၊ ဧရာဝတီတိုင်း၊ ပဲခူးတိုင်း၊ ကရင်ပြည်နယ်၊ မွန်ပြည်နယ်နဲ့ တနင်္သာရီတိုင်းတို့မှာတော့ နေရာစိပ်စိပ်မှ နေရာအနှံ့အပြား မိုးထစ်ချုန်း ရွာလာနိုင်ပါတယ်။
အမြင့်ဆုံး အပူချိန်
အမြင့်ဆုံး အပူချိန်ခန့်မှန်းချက် အနေနဲ့ကတော့ နေပြည်တော်၊ ရန်ကုန်၊ မန္တလေး၊ ပဲခူး၊ မကွေး၊ စစ်ကိုင်းတိုင်း၊ ဧရာဝတီတိုင်း၊ တနင်္သာရီတိုင်း၊ ကရင်ပြည်နယ်နဲ့ မွန်ပြည်နယ်တို့မှာ ၉၁ ဒီဂရီဖာရင်ဟိုက်မှ ၁၀၀ ဒီဂရီဖာရင်ဟိုက်ကြား၊ ကချင်ပြည်နယ်၊ ကယားပြည်နယ်၊ ရခိုင်ပြည်နယ်၊ ရှမ်းပြည်နယ်အရှေ့ပိုင်းနဲ့ မြောက်ပိုင်းတို့မှာ ၈၀ ဒီဂရီဖာရင်ဟိုက်မှ ၉၀ ဒီဂရီဖာရင်ဟိုက်ကြား၊ ချင်းပြည်နယ်နဲ့ ရှမ်းပြည်နယ်တောင်ပိုင်းတို့ မှာ ၇၀ ဒီဂရီဖာရင်ဟိုက်မှ ၈၀ ဒီဂရီဖာရင်ဟိုက်ကြားမှာ ရှိနိုင်ပါတယ်။
အနိမ့်ဆုံး အပူချိန်
အနိမ့်ဆုံး အပူချိန် ခန့်မှန်းချက်အနေနဲ့ ချင်းပြည်နယ်မှာ ၅၃ ဒီဂရီဖာဟိုက်၊ ကချင်ပြည်နယ်၊ ကယားပြည်နယ်နဲ့ ရှမ်းပြည်နယ်တို့မှာ ၆၁ ဒီဂရီဖာရင်ဟိုက်မှ ၇၀ ဒီဂရီဖာရင်ဟိုက်ကြား၊ နေပြည်တော်၊ စစ်ကိုင်းတိုင်း၊ မန္တလေးတိုင်း၊ မကွေးတိုင်း၊ ရန်ကုန်တိုင်း၊ ပဲခူးတိုင်း၊ ဧရာဝတီတိုင်း၊ တနင်္သာရီတိုင်း၊ ရခိုင်ပြည်နယ်၊ ကရင်ပြည်နယ်၊ မွန်ပြည်နယ်တို့မှာ ၇၁ ဒီဂရီဖာရင်ဟိုက်မှ ၈၀ ဒီဂရီဖာရင်ဟိုက်ကြား ရှိနိုင်ပါတယ်။
အယ်လ်နီညိုပေါ်ပေါက်ရန် ဖြစ်နိုင်ခြေ မြင့်မားနေ
၂၀၂၆ ခုနှစ် မေလမှ ဇူလိုင်လအတွင်း အယ်လ်နီညို စတင်ဖြစ်ပေါ်လာနိုင်ခြေ ၆၁ ရာခိုင်နှုန်းရှိပြီး ၂၀၂၆ နှစ်ကုန်အထိ ဆက်လက်တည်ရှိနိုင်တယ်လို့ ဦးဝင်းနိုင်က မိုးလေဝသ အချက်အလက်များအပေါ် သုံးသပ်တင်ပြထားပါတယ်။ ယခုနှစ်မှာ မိုးနည်းနိုင်ကာ အယ်လ်နီညိုဟာ နှစ်ကုန်ပိုင်းမှာ ဆက်လက်အားကောင်း လာနိုင်ပြီး ဆောင်းရာသီ အအေးလျော့နိုင်ကာ ၂၀၂၇ နွေရာသီအတွက် ရေရှိမှုအခက်အခဲနဲ့ လျှပ်စစ်မီးရရှိမှု အခက်အခဲ၊ အပူလွန်ကဲနိုင်တဲ့ ရာသီဥတုအခြေအနေတွေအတွက် ကြိုတင်ပြင်ဆင်ထားသင့်တယ်လို့ သုံးသပ်ထားပါတယ်။
၂၀၂၇ ခုနှစ်အတွက် မိုးခေါင်ရေရှားမဖြစ်ဖို့ ကြိုတင်ပြင်ဆင်ထားသင့်
အကယ်၍ အယ်လ်နီညိုဖြစ်ပေါ်လာမှု ပိုမိုအားကောင်းလာပါက လာမဲ့ နွေရာသီ အပူလွန်ကဲမှုနဲ့ မိုးခေါင် ရေရှားနိုင်မှုတွေအတွက် ယခုကတည်းက ကြိုတင်ပြင်ဆင်မှုများ ပြုလုပ်ထားသင့်တာပဲ ဖြစ်ပါတယ်။ ယခုနှစ် မိုးရာသီမှာကတည်းက မိုးနည်းနိုင်တယ်လို့ ကြိုတင်ခန့်မှန်းမှုများရှိနေပြီး ဆောင်းမှာလည်း အအေးပေါ့နိုင်တယ်လို့ ခန့်မှန်းမှုများရှိနေပါတယ်။
စူပါ ပါဝါနှစ်ယောက် တွေ့ဆုံမှုနဲ့ ကမ္ဘာ့ရွှေဈေး
ပြီးခဲ့တဲ့ ရက်သတ္တပတ်တွေကတည်းက တည်ရှိနေတဲ့ ရွှေဈေးနှုန်းနဲ့ သိပ်အပြောင်းအလဲမရှိဘဲ တည်ရှိနေ ရာကနေ ကမ္ဘာ့ စူပါ ပါဝါ ခေါင်းဆောင်းနှစ်ယောက် ဖြစ်တဲ့ အမေရိကန် သမ္မတနဲ့ တရုတ်သမ္မတတို့ တွေ့ဆုံမှုမှာ ကမ္ဘာ့ထိပ်တန်း စီးပွားရေးသမားတွေလည်း ပါဝင်ခဲ့ပြီး ခေါင်းဆောင်နှစ်ဦးရဲ့ စစ်ရေး၊ စီးပွားရေး ဆွေးနွေးမှုတွေဟာ ကမ္ဘာကြီးရဲ့ စီးပွားရေးတွေနဲ့လည်း အချိုးကျနေပါတယ်။ ကမ္ဘာ့ရွှေဈေးဟာ တအောင်စကို ၄၅၀၀ ခန့်ကို ပြန်ကျခဲ့ပြီး မြန်မာ့ရွှေဈေးဟာလည်း ပြင်ပပေါက်ဈေးမှာ ၁၀၂-၁၀၃ သိန်းခန့်ကို ပြန်လည်ကျဆင်းခဲ့ပါတယ်။ ၁၅ ပဲရည်ဈေးကတော့ ပြင်ပဈေးကွက်မှာ သိန်း ၁၀၀ အောက်မှာ ရှိပါတယ်။
92 ဈေး အနည်းငယ်တက်ပြီး ကျန်တာ ဈေးကျတဲ့ စက်သုံးဆီ
မေလ ၁၆ ရက် ရန်ကုန်မြို့ စက်သုံးဆီဆိုင်တွေရဲ့ လက်လီအရောင်းဈေးကွက်မှာ 92 တစ်လီတာဈေးနှုန်းဟာ ၄၅၆၅ ကျပ်၊ 95 တစ်လီတာ ၄၆၄၅ ကျပ်၊ ဒီဇယ်တစ်လီတာ ၄၈၂၀ ကျပ်၊ ပရီမီယံဒီဇယ်တစ်လီတာ ၅၈၁၅ ကျပ်ဖြစ်ပါတယ်။ 92 ဈေးကတော့ အနည်းငယ်တက်ပြီး ကျန်တဲ့ စက်သုံးဆီတွေကတော့ ဈေးအနည်းငယ်စီ လျော့ကျခဲ့ပါတယ်။
Source: Win Naing (မိုးလေဝသ)
: မိုးလေဝသနှင့် ဇလဗေဒညွှန်ကြားမှုဦးစီးဌာန
မြေဆီလွှာမပျက်စီးစေဖို့ သဘာဝမြေသြဇာကို သုံးကြပါစို့
မြေဆီလွှာ ပြန်လည်ကောင်းမွန်စေဖို့ သဘာဝမြေသြဇာကို သုံးကြပါစို့
အရောင်းကိုယ်စားလှယ်များကို ဖိတ်ခေါ်အပ်ပါတယ်၊
#ဂရန်တီသဘာဝမြေသြဇာ (အော်ဂဲနစ်မြေသြဇာ) FB Page မှာ စုံစမ်းနိုင်ပါတယ်၊
