15/10/2026
नेपालका विवेक गौतमद्वारा श्रीलंकामा आयोजित 'वर्ल्ड कंग्रेस अन स्नेक्स २०२६' मा सहभागिता।
पथरीशनिश्चरे, मोरङ — पथरीशनिश्चरे नगरपालिका वडा नं. ३ का विवेक गौतमले श्रीलंकामा सम्पन्न भएको अन्तर्राष्ट्रिय सम्मेलन 'वर्ल्ड कंग्रेस अन स्नेक्स २०२६' (World Congress on Snakes 2026) मा सफलतापूर्वक सहभागिता जनाउनुभएको छ।
विश्वभरका ४० भन्दा बढी देशहरूबाट आएका ४०० भन्दा बढी सर्प विशेषज्ञ, वैज्ञानिक तथा अनुसन्धानकर्ताहरूको उपस्थिति रहेको उक्त सम्मेलनमा नेपालको प्रतिनिधित्व गर्दै गौतमले आफ्नो अनुभव तथा विचार प्रस्तुत गर्नुभएको थियो।
सम्मेलनका क्रममा उहाँले नेपालमा पाइने विषालु सर्पहरूको जानकारी समेटिएको सचेतनामूलक ब्यानर/पोस्टर प्रदर्शन गर्दै अन्तर्राष्ट्रिय मञ्चमा नेपालका सर्प तथा तिनको संरक्षणबारे जानकारी गराउनुभएको थियो।
विश्वभरका विज्ञहरूसँग विचार आदानप्रदान गर्ने, सर्प संरक्षण र अनुसन्धानका नयाँ प्रविधिबारे सिक्ने र नेपालको तर्फबाट आफ्नो प्रस्तुति राख्ने यो अवसर अत्यन्तै फलदायी र अविस्मरणीय रहेको गौतमले बताउनुभयो।
गौतमको यस सहभागिताले स्थानीय स्तरमा मात्र नभई राष्ट्रिय तथा अन्तर्राष्ट्रिय स्तरमै सर्प संरक्षण र जैविक विविधताको प्रवर्धनमा महत्त्वपूर्ण योगदान पुग्ने विश्वास लिइएको छ।
