12/10/2026
كاين واحد المثل انجليزي مشهور كيگولك : in the land of the blind, the one-eyed man is king وهاد المثل كينطابق بالضبط على هادشي لي واقع وكنشوفوه حاليا فالوداد والرجا !
الترجمة ديالو هي فالبلاد ديال العميين هداك لي عندو عين وحدة كيشوف بيها كيكون هو الملك ..تخيل مجموع لعابة لي فهاد الفراقي حاليا هو 40 كلهم عميين إلا جوج لي عورين وكيبانو ملوك فالتيران
كازا كانت معروفة مدينة ديال الكوايرية وكانو الوداد والرجا ما كيلعبش فيهم البراني بزاف كتلقى 90٪ ولاد المدينة القديمة وبورگون و درب سلطان والبرنوصي والحي المحمدي وكلهم تحشم تبرك معهم فالبون توش حيت كيطيروا والميزانية باش مقيومين كاملين يلاه ساوية كونطرا ديال جبران ولا ديال الدحماني ..
اليوم كتحس أن كازا بحلا تقداو فيها الكوايرية حيت مابقاتش ديك الثقافة ديال التورنوات والماتشات بين الدروبة وداك الشغف بدا كيموت عاد التسمسير والتبزنيز فسميات ديال زماگرية وبرازيليين واليديهم ماكيعرفوهمش ..
وهاد الخرشف الكروي لي كتعاني منو كازا مساهم فيه حتى الجمهور تاهو بشكل كبير حيت ميمكنش إنسان كويري كيعرف يتفرج غيمشي يقطع تيكي ب 50 درهم باش يدعم هاد العفن أنا كنتفرج غا فالتلفزة وما كنفوتش فيهم 10 دقايق وكنطفيها وكنحس براسي ضيعتها من حياتي ..
هاد جوج فراقي ايلا بقاو غادين فهاد التسيير ديال 3 على براد غادي يزيدوا يتقبروا ويغبر ليهم الشقف وهادشي لي بغاو شي وحدين وكيخططوا ليه من بكري ..
كازافوبي ✍️
