https://www.facebook.com/368132006974053/

Casaphobia - كازافوبيا, Villafranca di Verona (2026)

17/07/2026

تخيل تكون ساكن حدا دار الأيتام ومولف ديما كتشوفهم وكتسلم عليهم وحتى هوما كيعرفوك وكيعيطو ليك عمي ياسين حتال لبارح ضربك الفيقة على الغوات والبكا ديالهم والعافية زاندة عندهم ..

هاد السيد سميتو ياسين إبريزي هو جار دار الأيتام فالمحمدية فالعاصمة الجزائرية أول حاجة دارها فاش سمع دوك الأصوات البريئة كتغوت هز مطرقة وحبل ودخل وسط داك الدخان والعافية وبدا كيشوف دوك الوليدات محبوسين ورا الباروداج ديال الحديد وما عندهمش منين يزهقوا ..

ربط الحبل مزيان فالگرياج مع الطوموبيل ديالو بمساعدة ولدو أمين وبقا كيكسيري بكل ما أوتي من قوة جر وتقاتل وتحدى الموت حتى تهرس داك الشرجم وقدر يعتق 3 اليتامى و فاش سولوه الصحافة گال كليمة بكات الملايين:

حسيت براسي دخلت للجنة فاش تفتح هاداك الباروداج وسلكتهم ..

هاد البطل القومي عتق 3 دالوليدات من وسط الرماد وكلاها فعظامو مزيان خصوصا فالراس والكتف ولكن غيبقى مريض نفسيا طول حياتو حيت تمنى يعتقهم كاملين وهو كيسمع عمو .. عمو .. عمو وقال بفمو هاد الأصوات غتبقى محفورة لي فودني عمرني نقدر نساها 💔

هادشي اللي دار ياسين إبريزي ما خاصوش يمر مرور الكرام گاع المغاربة والجزائريين وخوتنا فالعالم كامل كنتمناو ونطالبو من السلطات الجزائرية تهلا فيه ودير ليه تكريم تاريخي كيليق بالشهامة والرجولة ديالو حيت بحال هاد النمادج بغيناهم يكونو قدوة للشعوب ..

وهادوك التلاتة د الوليدات اللي كتب ليهم عمر جديد على يديه يكونوا بإذن الله هما سبابو باش يدخل للجنة من أوسع أبوابها يا رب ..نسأل الله تعالى ان يرحم الضحايا برحمته الواسعة هوما وليدات يتامى عاشوا بلا حنان د الوالدين ف الدنيا ف يا ربي عوضهم بحنانك وعطفك ف الأخرة يا ربي اجعلهم طيور من طيور الجنة وافتح ليهم أبواب الفردوس الأعلى اللهم برد على قلوب كل من بكى عليهم واجعل قبرهم روضة من رياض الجنة.. أمين يا رب العالمين.

العز للرجال .. والرحمة للشهداء 🤲

كازافوبي ✍️

16/07/2026

نهار مات ريان فالبير كان أكثر شعب تضامن معنا هوما الجزائريين كنت كنشوف تدوينات على مدار الساعة قبل مايوصل الأجل والمنشورات ديالهم باقين لدبا فـ الپاج كدليل حي على هاد الهضرة.

اليوم الجزائر كتعيش فاجعة ثقيلة بزاف من بعد الحريق المأساوي اللي وقع فواحد الخيرية وأودى بحياة 11 طفل يتيم فمشهد كيضر فالخاطر فحق هاد الوليدات اللي عاشوا الدنيا مساكن بلا حنان الوالدين واقتضى قدر الباري باش تنتهي رحلتهم فهاد الدنيا فمصاب جلل كيقيس عمق المشترك الإنساني بيناتنا ..

فاش كيتعلق الأمر بالطفولة ..الحزن كيولي لغة عالمية كيفهموها گاع الناس بلا ترجمة و هاد التضامن العفوي بيناتنا كيقدم درس بلي حماية الذاكرة الإنسانية المشتركة ومواساة الجار فالمصائب ديالو هي واجب أخلاقي كيكبر على أي حسابات ضيقة وكتفرضوا علينا الفطرة السليمة ..

هاد الوليدات مرفوع عليهم القلم و الشهادة فحقهم ماشي غفران ذنوب وإنما ترقية ربانية وتشريف لدرجات الأنبياء والصديقين .. كنتقدموا بتعازينا الحارة من القلب لكل جزائري وجزائرية فهاد المصاب الجلل والله يرحم هاد الملائكة ويصبر القلوب اللي تحرقات عليهم ويسكنهم فسيح جناته يا رب ❤️

14/07/2026

كنعترف أنني كنت من الناس اللي رشحو فرنسا باش توج بالمونديال وكنت مقتنع بأنها المرشح رقم 1 ولكن الكرة كتفرض عليك بعض المرات تراجع بعض القناعات ملي كتكمل عندك الصورة ..

من بعد ما سالى مشوار الديكة بان ليا شخصيا أن جزء كبير من القوة اللي بانوا بها كان مرتابط بطبيعة المسار اللي دازوا منو مقارنة بمنتخبات بحال المغرب وإسپانيا حيت فرنسا استفادت من طريق أقل استنزاف للطراوة وهاد الشي خلاها توصل للمربع الذهبي وهي محافظة على أغلب مخزونها البدني ..

مالعبو ما حتى منتخب مصنف من العشر الاوائل حتى لدومي فينال لعبوا مع العراق و السنغال و النرويج و من بعد السويد والپارغواي وشدونا حنا لقاونا واكلين لخليع و داخلين بعقلية انهزامية وهادشي بان حتى فالتصريح ديال وهبي فالندوة الاخيرة ..

هاد الكلام ماشي باش ننقص من قيمة المنتخب الفرنسي ولكن بصراحة أي منتخب خاصو يستغل الفرص اللي كيمنحها ليه جدول المنافسة غير من باب الموضوعية خاصنا نعترفو أن صعوبة المسار كتأثر على صورة أي منتخب وكتلعب دور كبير فالمستوى اللي كيبان به فالأدوار الحاسمة

المغرب بدا بالبرازيل و جات فطريقو هولندا و زادوه البلد المنظم والله ما ساهلة فاش كتحقق فيها والمصيبة لاعب معهم ب 11 لعاب حتى البونتوش عندك ضعيف ..

فهمت اليوم أن الكرة ماشي فقط غير جودة اللاعبين ولكن حتى توقيت المواجهات وإدارة المجهود والزهر ديال القرعة حيت اللي كيشوف غير النتيجة النهائية كيغفل نصف الحقيقة !

لهذا أعتذر مجددا حيت التحليل الحقيقي ماشي هو اللي كيبقى متشبث برأيو وكيبغي يرقعو باش يبان ديما هو الفاهم وإنما اللي كيصحح نفسو ملي كتبان معطيات جديدة وهنا كتكمن قيمة النقاش الرياضي بيناتنا ❤️

كازافوبي ✍️

13/07/2026

كنعقل فاش المغرب وصل لدومي فينال خرجو المغاربة احتافلو فالشوارع فديك الليلة صافي وبقاو كيتسناو حتى رجع المنتخب من قطر ومشاو فرحوا معه فالرباط وسالا الفلم ..

ملي كنشوف حجم الاحتفالات واللهفة اللي دايرين المصريين على دور الثمن النهائي كنستوعب الفرق بين أنك تربح كاس افريقيا وبين توصل لدور متقدم فبطولة لي العالم كامل كيشوفها وكتفهم أن كورنير واحد ضد الارجنتين يعادل الفوز ب 3 كؤؤوس افريقية من حيث الفرحة هه

بهاد المشاهد كنزيد نتأكد من العقدة لي خلقها المغرب للجيران وخلاهم يتسناو هاد الكاس بفارغ الصبر باش يحطمو الرقم ديالو ولكن فاش شاركوا كاملين اقتانعوا بما لا يدع مجالا للشك أن ربع نهائي المونديال بمثابة معجزة ومستحيل تحقق حيت ملي بداو كيلعبو الكرة كاملين عمرهم وصلوا ليه فما بالك بالدومي فينال يا حبيبي ..

بغيت غا نعقل على البرامج ديالنا جابو وليد الرگراگي ولا ياسين بونو ولا حكيمي وبقاو داوين وكيزمرو مدة أسبوع ولا كثر والو لي شفت هو استقبال ملكي وجولة بحافلة مكشوفة وبدينا نفكروا فكاس افريقيا فالمغرب ,:..

بنادم عندنا مازال ما بغى يفهم أنه ف قطر بمجرد ما كتجاوز الگروپات كيبقى خاصك غا ماتش واحد تربحو باش دخل فلاليست ديال 8 الكبار أما فميريكان را خصك جوج ماتشات وهادشي لي حققوه الدراري را ماساهلش ولكن فنفس الوقت مزيانة تربى عندنا هاد العقلية ديال مابقيناش راضيين بهاد الأدوار ويولي العادي عندنا هو نوصلو للربع ..

الخدمة يلاه بدات ومازال المنتخب يولي يخلع مع وهبي ايلا خلاوه يخدم حيت شفنا معه منتخب كيفرض شخصيتو وكيلعب بالريتم لي كنا كنحلموا بيه أما ضد فرنسا معذورين اللعابة حيت الفرارج داروا كاطريام ومازال غيديرو سيزيام ويعفطوا على كولشي وهاد العام ديالهم ..

كازافوبي ✍️

11/07/2026

أغلب المغاربة ماعارفينش أن بونو فعمرو 35 عام وماعارفينش أن لا تاكتيك الرگراگي ولا تاكتيك وهبي يلاه كيشكلو 10٪ من الفضل لي عطى بونو للمنتخب حيت بلا بيه عمرك كنتي توصل لهادشي ..

ف قطر بسبابو باش دزتي للربع أول مرة فتاريخك و بسبابو وقفتي ضد كريستيانو وبيكيتيه وحتى اليوم ايلا رجعتي لگاع الماتشات من البرازيل وانت جاي مغتقدرش تحسب شحال من كرة حيد ليك كانت ترجعك فأول طيارة كيفما رجعوا منتخبات عندهم گوال عاديين ..

بونو كون لقى دفاع صحيح فيه النيبت وحداه بن عطية فياماتو وحكيمي ديال PSG ونصير فالفورما كنتي غتمل من الفينالات حيت غتوصل ليهم وانت مرتاح بعينيك مغمضين ..

علاش ذكرت السن ديالو فأول جملة لأن ياسين فاش كيبكي هو لي عارف اقتراب نهاية حقبة ذهبية والجهد ضروري كيتقادا مع تقدم السن وربما مايكونش حاضر معنا فمونديال المغرب ايلا بقينا فالحياة ..

تقدر تعوض مدافع وتعوض وسط التيران وأظهرة وأجنحة و رؤوس حربة ولكن باش تلقى گول أسطوري بحال هاد السيد خاصك تسنى 100 عام وشوف تشوف ..

بونو من الناس لي كتسالي فحقهم الهضرا وخا تبغي تشكرو غتلقا راسك ماقادرش توفي ليه حقو ولسانك كيتبلوكا و يلا گلتي ليه شكرا بحلا عيرتيه حيت ماكافياش ويلا كان شي واحد يستاهل يتخلد سميتو فالمغرب سواء على شارع رئيسي ولا ملعب ولا مركز تكوين فهو ياسين بونو حيت بعض الناس كيربحو الألقاب ولكن قلال بزاف لي كيربحو حب واحترام شعب كامل ❤️

كازافوبي ✍️

07/07/2026

نظرية لي كيشجعو حفيظ الدراجي كيخسر صحيحة .. كانوا هانيين حتى كتب عليهم منشور بين الشوطين كيلحس فيهم يا ربي تبعدوا علينا

06/07/2026

تصدق زعما هاد الحلمة 🥶

05/07/2026

شخصيا كنفضل نبدا بمزراوي كظهير أيمن ونرجعو لپوسط ديالو المعهود باش يجوع مع مباپي و يقطع عليه الما والضو تما وحكيمي نزيدو يلعب جناح وتبادلو الأدوار بيناتهم فداك الكولوار..

أشرف ملي بدا المونديال شخصيا ممقنعنيش و ماعطانا حتى 25٪ من حكيمي ديال PSG الماتش الوحيد لي شمينا ريحتو شوية هو هايتي وخا حتى هو دفاعيا كان ناقص ..

وفاش كيلعب ضد عشيرو كيولي رطب وكيبدا ينبطح ليه وكيديرو طريق كيبقا يتقدا فيه كيف بغا نتمنى وهبي يدير شي حركة تما حيت هي مصدر الخطورة خاصها شي زكروم مصدي فيه ريحة الكبريت هه

مزراوي دفاعيا حسن وخا غيلعب وهو مازال مقصح من كتفو وبان هادشي فماتش كندا كيفاش كمل الماتش بزز ولكن مبابي ميمكنش تحط ليه حكيمي و الواعرة ايلا دخل حلحال صافي غيكون عندو العرس ..

المشكل هو غيبقى عندنا ترعة فالجهة اليسرى مانظنش ينجمها أنس صلاح الدين غيخرطوه تاهو كاين واحد الدريري مسموم ولكن ميقدرش يزعم بيه وخا ظهير أيمن هو الواحدي ساقطة يحرر ديك الجهة وخا تغيير غيكون فيه مجازفة فماتش مصيري ولكن كنعقل السكيتيوي وظفو ظهير أيسر و كان جلطيطة ..

عموما انا ضد حكيمي كظهير أيمن فهاد الماتش حيت كيطلع بزاف وكيرجع معطل ومن ديك الجهة غيتقداونا كيفما تقداونا ف قطر

كازافوبي ✍️

05/07/2026

باش مانكونوش مجحفين فحق راس لاڤوكا حيت ماكينش لي تقبوا ضد فرنسا گد داك الديفونس الكارثي وثنائية داري والياميق وبلا ماندويو على التحكيم والكولسة طبعا ..

وليد الرگراگي كمدرب ماكانش ساهل نهائيا وكان يستحق الأفضل وكان تايق غايعفط على فرنسا كون ماتوعتوش ليه الركائز الدفاعية وبقا مكمل بمنتخب عرج من ماتش البرتغال وهو كيرقع ومع ذلك دار ماتش كبير ضد فرنسا اوصل للپوطو شحال من مرة وتحيد ليه پينالتي ديال بوفال عين باين ..

قليل لي كيعرف يتفرج بلا مايتسنى يسمع التصريح ديال المدرب باش يشرح كيفاش لعب وشنو دار .. بنادم بزاف ما عارفش أن وليد ف 5 الماتشات الاولين قبل الدومي فينال كان كيلعب برسم تاكتيكي واحد هو باش تشهر ديال 4-1-4-1 ب mid to low block كيضيق المساحات وكيخلي البالون للمنافس يستحوذ عليه وكيتسناه يغلط باش يعاقبو بالكونطر !

ولكن وليد فالدومي فينال والماتش السادس را مادخلش ب 4-1-4-1 بدل الرسم والشيما تاكتيك كاملة حيت توعت ليه نايف اكرد قبل مايبدا الماتش وجابو حتال نهار الكبير وخوا بيه وخربق ليه الحسابات كاملة ودخل ليهم ب 5-4-1 لعب ليهم ب 3 فلاكس ب سايس و داري والياميق وكان مكره يدخل بهاد الخرشف باش يحد من خطورة مباپي وديمبلي وجيرو وخصوصا مبابي لي كان مقلع كتر من دبا وهادشي بالضبط لي خسرو الماتش أما برب مايخسر ..

وزاد توعت ليه الكاپيطانو سايس وخرجو فدقيقة 20 ودخل بلاصتو سليم أملاح وتوعت ليه مزراوي وكمل بعطية الله دوزيام ميطا كاملة تخيل هاد المعاناة كاملة و بنادم ماسوقوش فيها هو باغي غا يربح وإلا يشبع فالرگراگي سبان ..👎

لقرع كيبقى مدرب محنك وشخصيا عمرني نسى خيرو وخا كانوا عندو عيوب كثيرة منها قصوحية الراس والتبلبيل ولكن كيبقى فيلسوف زمانو استافدات منو الكرة المغربية بزاف ونتمنى منطيحوش فنفس الوضعية ويكونوا الدراري واجدين 100٪ بدنيا وذهنيا وينصفنا التحكيم هاد المرة حيت بغينا غا ديالنا مابغيناش الهدايا ✌️

كازافوبي ✍️

04/07/2026

فلم ديال الخليع كيتسنانا نهار الخميس وكاملين عندنا نفس السؤال شنو موجد وهبي كخطة و نهج تاكتيكي ضد أصدقاء كيليان مباپي باش يفك عقدة الديكة و يدير الديماراج لدومي فينال ..

ماتش ممنوع على أصحاب القلوب الضعيفة خصوصا فحالة ما استرجعناش خدمات شادي و الصيباري غانعانيو الأمرين مع هاد مساخيط الوليدين لي تايقين فراسهم بزاف وناوين يهزو الكوپ هاد العام ..

فرنسا معروفة بالسرعة الخيالية فالمرتدات والتحولات والبروفيسور وهبي عارف هادشي وعلى دراية به وغيكون تفرج فيهم وقراهم وداكشي علاش الخطة الأساسية ديالو غتكون بدرجة اولى مبنية على تضييق المساحات وخنق زوايا التمرير كيفما دار مع البرازيل ..

شخصيا متأكد ديدي ديشامب غيخلي لينا البالون ونفس الشي وهبي ماغاديش يرجع للور ويخليهم يضغطو علينا غادي يعتمد على تقارب الخطوط وسط التيران وهاد الاستراتيجية الوحيدة الكفيلة دخلهم فالشك وتجرهم للاشواط فحالة بقات النتيجة متعادلة وگدما جرجتيهم گدما الثقة كتكبر والحلم كيقرب ..

هذا فينال قبل الوقت من زهرنا المسار ديالنا فيه غا السبوعة وحنا من عادتنا ما كنبكيوش ونتخباو فحالة كان التحكيم نزيه حسن من ماتش قطر و كانوا اللعابة واجدين كنظن مع وهبي ان شاء الله تمشي الامور كيف كنتمناو ..

الجميل هو عندك أغلب الدراري تكونوا في فرنسا و حافظين اللعب ديالهم علاش لا الكرة هادي وحتى هوما عارفين هاد المرة المغرب جاي بعقلية اخرى .. ماتش كنشوفوا لي داز فيه غايهز الكوپ ✌️❤️

كازافوبي ✍️

Casaphobia - كازافوبيا

17/07/2026

16/07/2026

14/07/2026

13/07/2026

11/07/2026

07/07/2026

06/07/2026

05/07/2026

05/07/2026

04/07/2026

Indirizzo

Telefono

Sito Web

Notifiche

Contatta L'azienda

Scelte rapide

Condividi