25/08/2026
ഈ സിനിമയ്ക്ക് സൂപ്പർ ശരണ്യ എന്ന പേര് വരാനുള്ള കാരണമെന്താണ് ? ഇതിൽ അനശ്വര രാജന്റെ കഥാപാത്രം നാട്ടിൽ ഉള്ളപ്പോൾ അവിടുള്ള പിള്ളേർ സൂപ്പർ ശരണ്യ എന്ന് വിളിക്കുന്നതായി കാണിക്കുന്നുണ്ട്. അതെന്തിനാണെന്ന് പടത്തിൽ പറയുന്നില്ല. അങ്ങനെ വിളിക്കാൻ മാത്രം ഈ നായികയ്ക്ക് എന്തേലും പ്രത്യേക കഴിവോ സൗന്ദര്യമോ ഉള്ളതായും കാണിക്കുന്നില്ല. തന്നെ ശല്യം ചെയ്യുന്ന സീനിയറിനെ എതിർക്കാൻ ധൈര്യമില്ലാത്ത, അതിരു വിടുന്ന അധ്യാപകനെ നിലയ്ക്ക് നിർത്താൻ കഴിവില്ലാത്ത, മുന്നും പിന്നും തിരിയാത്ത വഴിയേ പോയ ഏതോ ഒരുത്തനെ പ്രേമിക്കുന്ന ഒരു നായികയാണ് ഇതിലെ അനശ്വര രാജന്റേത്. അതേ സമയം ഇതിലെ മമിത ബൈജുവിന്റെ കഥാപാത്രത്തെ ശരണ്യ എന്ന പേരും കൊടുത്ത്, അവരെ ചുറ്റിപ്പറ്റിയായിരുന്നു ഈ സിനിമയെങ്കിൽ അതിന് സൂപ്പർ ശരണ്യ എന്ന പേര് എന്ത് കൊണ്ട് വന്നെന്ന് ചിന്തിക്കേണ്ടി വരില്ലായിരുന്നു.
