22/08/2026
മീശമാധവന്- Meesa Madhavan(2002)
'രണ്ടാംഭാവം' എന്ന വലിയ പരാജയത്തിനുശേഷം ലാല്ജോസും രഞ്ജന്പ്രമോദും ഉയിര്ത്തെണീറ്റ സിനിമയാണ് മീശമാധവന്. അയല്പക്കത്തെ പയ്യന് ഇമേജില് നിന്നും ജനപ്രിയനായകനായി മാറിയ ദിലീപിന്റെ താരപദവിയിലേക്കുള്ള ചുവടുവെയ്പ് കൂടിയായിരുന്നു മീശമാധവന്. ചേക്ക് എന്ന സാങ്കല്പിക ഗ്രാമത്തെ ചുറ്റിപ്പറ്റി ഉണ്ടാക്കിയ ഒരു കഥയില് ഒരു കൂട്ടം മനുഷ്യര് അഴിഞ്ഞാടുന്നതാണ് അക്ഷരാര്ത്ഥത്തില് നാം കണ്ടത്. ചുരുക്കത്തില് മലയാള സിനിമയില് റിപ്പീറ്റ് വാച്ച് ക്വാളിറ്റിയിലും കാലാതിവര്ത്തിയായ ഹാസ്യരംഗങ്ങളുടെ കാര്യത്തിലും ഒരു ബെഞ്ച്മാര്ക്ക് സിനിമയായി മാറി മീശമാധവന്.
മുമ്പും ജോഡിയായിട്ടുണ്ടെങ്കിലും ദിലീപ്-കാവ്യാമാധവന് ജോഡികള് ഒരു ഭാഗ്യജോഡിയായി രെജിസ്റ്റര് ആവുന്നത് തെങ്കാശിപ്പട്ടണത്തിന്റെ വിജയത്തോടെയാണ്. വില്ലന് വേഷത്തിലെത്തിയ ഇന്ദ്രജിത്തിന്റെ രണ്ടാംചിത്രമാണ് മീശമാധവന്(As an Adult Actor).
ജഗതി ശ്രീകുമാര്, കൊച്ചിന് ഹനീഫ, ഹരിശ്രീ അശോകന്, സലിം കുമാര്, ഒടുവില് ഉണ്ണികൃഷ്ണന്,ജ്യോതിര്മയി, മാള അരവിന്ദന്, സുകുമാരി, കാര്ത്തിക, ഇ.എ രാജേന്ദ്രന്, മച്ചാന് വര്ഗീസ്, ഗിന്നസ് പക്രു, ജയിംസ്, മണികണ്ഠന് പട്ടാമ്പി, അംബിക മോഹന്, ഗായത്രി, മാസ്റ്റര് അരുണ്, സനുഷ, കോഴിക്കോട് നാരായണന് നായര്, വിജയന് പെരിങ്ങോട്, മീന ഗണേഷ് തുടങ്ങി ഗംഭീര കാസ്റ്റിങ്. പാസിങ് ഷോട്ടില് പോയവര്ക്ക് പോലും അഭിമാനിക്കാവുന്ന ഗംഭീര സീനുകള്.
സിനിമയുടെ ക്രെഡിറ്റില് പകുതി ഗിരീഷ് പുത്തഞ്ചേരിക്കും വിദ്യാസാഗറിനും കൊടുക്കണം എന്ന് പറഞ്ഞാല് ആരും എതിരുപറയില്ല എന്ന് മാത്രമല്ല, സിനിമയുടെ പാട്ടുകളുടെ വിശേഷത്തെപ്പറ്റി വേറൊന്നും പറയേണ്ടതുമില്ല. ഇന്നും പാട്ടുകള് ജനറേഷനുകള് കീഴടക്കി മുന്നേറുന്നു.
250 ദിവസത്തോളം തിയേറ്ററില് ഓടിയ ഈ സിനിമ തിയേറ്ററില് കാണാന് കഴിഞ്ഞവര് ഭാഗ്യവാന്മാര്..
