27/05/2026
გელა კანდელაკი 86 წლის გახდა
დღეს მასთან ერთად, მისივე შექმნილი ხელის ჩრდილების თეატრისა და პირველი სპექტაკლის, „წელიწადის ოთხი დრო,“ დაბადების დღეცაა.
რა თქმა უნდა, დღევანდელ საიუბილეო სპექტაკლს ამჯერად ქართლის ულამაზეს სოფელ არბოში ბატონ გელას მივუძღვნით.
გელა კანდელაკი - კინორეჟისორი, პროდიუსერი, სცენარისტი, მსახიობი, ხელის ჩრდილების თეატრის ბუდრუგანას დამფუძნებელი, რეჟისორი და სამხატვრო ხელმძღვანელი 1940 წლის 27 მაისს თბილისში დაიბადა.
გელა კანდელაკი არაერთი მხატვრული, დოკუმენტური და ანიმაციური ფილმის რეჟისორი და პროდიუსერია
მან სრულმეტრაჟიანი მხატვრული ფილმი „უბედურება“ დავით კლდიაშვილის ამავე სახელწოდების მოთხრობის მიხედვით 1979 წელს გადაიღო.
მისი სრულმეტრაჟიანი დოკუმენტური ფილმი „სოფელი“ კი 2007 წელს, სორეზის დოკუმენტური ფილმების ფესტივალის (საფრანგეთი)
გრანპრის მფლობელი გახდა...
2006 წლიდან თანამშრომლობს ფესტივალთან „თბილისი — თანამედროვე მუსიკის საღამოები“, რომლის ფარგლებში არაერთი მულტიმედიური წარმოდგენის თანაავტორია.
2009 წლიდან თანამშრომლობს ქორეოგრაფ მარიამ ალექსიძესთან, რომელთან ერთადაც, რამდენიმე თანამედროვე ქორეოგრაფიული წარმოდგენის რეჟისორია.
2011 წლიდან ნიქოზისა და ცხინვალის მიტროპოლიტ ისაიასთან ერთად, „ანიმაციური ფილმების საერთაშორისო ფესტივალის - ნიქოზი”-ს დამფუძნებელია.
წლების განმავლობაში ეწეოდა და აგრძელებს პედაგოგიურ საქმიანობას საქართველოსა და უცხოეთში.
არის რამდენიმე ფესტივალის ჟიურის წევრი.
27 მაისი ჩვენი თეატრისთვისაც დაბადების დღედ იქცა.
1991 წლის 27 მაისს ჩვენი პირველი სპექტაკლის „წელიწადის ოთხი დრო” პრემიერა შედგა პარიზში.
ყველაფერი 1982 წელს თბილისში დაიწყო, როცა გელა კანდელაკმა სხვადასხვა პროფესიის ახალგაზრდები შეკრიბა. თოჯინების არქონის და უსახსრობის გამო, ჩრდილები გაახსენდათ და ხელის ჩრდილების თეატრი „ბუდრუგანა“ შექმნეს, რომელიც უნიკალური აღმოჩნდა მთელს მსოფლიოში.
დღეს ბუდრუგანას საქმეს ბუდრუგანა-გაგრა აგრძელებს, რომლის ბირთვიც გელა კანდელაკმა შეკრიბა აფხაზეთიდან და სამაჩაბლოდან დევნილი ახალგაზრდებისგან. თეატრმა დღემდე 40-მდე ქვეყანა და საქართველოს მრავალი ქალაქი თუ სოფელი მოიარა.
27 მაისი კიდევ ერთ აღსანიშნავ მოვლენასთანაა კავშირში: 2016 წლის 27 მაისს „დაიბადა” „ბუდრუგანა-ლიეტუვა“ - „ბუდრუგანა-გაგრას“ შვილობილი ხელის ჩრდილების თეატრი. ლიტველ მსახიობთა დასი 2 წლის განმავლობაში თბილისში ეუფლებოდა ჩრდილების ხელოვნებას ბატონი გელას ხელმძღვანელობით.
პრეზიდენტმა დალია გრუბაუსკაიტემ გელა კანდელაკს 2018 წელს საპატიო ორდენი გადასცა ლიეტუვური კულტურის წინაშე დამსახურების გამო.
ახლაც მუშაობს, ჩვენი, ხელის ჩრდილების თეატრის „ბუდრუგანა-გაგრას დასთან“ და სტუდენტებთან, შეგირდებთან ერთად.
ვულოცავთ ბატონ გელას დაბადების დღეს და ჯადოსნური ხელოვნების შექმნისთვის
დიიიდ მადლობას ვუხდით
სიყვარულით,
ბუდრუგანა-გაგრა