شب متهم بقتل بيو ، كل الدلائل بتشير إنو هوي القاتل ، جارن اللي تحت بيتن سمعو عم يقلو لبيو : بيي لا تخليني جن ع رب اللي عملك وجكلك هالسكين بخاصرتك انا شب أزعراني كتير وبتسمع ع حموبيكا ومهرجانات مصرية وبقعد أنا ورفقاتي يوم الخميس بشارع هنانو بنلطش ع البنات وما عندي مزح ، ونفسو جارن سمع صوت خبيط تنين ميعفسو بعض ولما فتح الباب ليشوف مين ميغوش شاف العجي راكد من باب البيت ، وبالمقابل جارتن اللي بوجه بيتن شافيتو برضو عم يقتلو في جوز عيونا اللي بدا تاكلن الدود ، والسكين اللي مات فيا الزلمة نفس السكين اللي عندو ياها ابنو ، ولما سأليتو الشرطة لهالكر وين كنت بوقت الحادثة قلن كنت بالسينما قالولو شو الفيلم اللي كنت عم تحضرو ، ما اتذكر ، قالولو مين الممثلين اللي كانو عم يمثلو كمان ما عرف ، يا شحميطتو هالصبي ما أغشمو ، المهم الشرطة تأكدت انو هوي الفاعل رغم إنو أكدلن إنو مو هوي القاتل ولا بيعرف مين قتل بيو ،
ف المحكمة اتخذت قرارها تقريباً ، بس لازم هيئة المحلفين المكونة من 12 شخص تتناقش بالموضوع لأخر مرة واذا اتفقوا كلن ع قرار واحد بيقدموه للقاضي وبيتم اتخاذ الحكم ع أساس هالشي ..
ف السؤال المفصلي هل هو القاتل ولا لأ ؟
الله يسعدلي مساكون والله بعرف مو فارقة مع صرمايتكون بفرنغ
المهم فيلم اميركي بيتصنف من أفلام الدراما والحوارات التاريخية ، كمية الاحتدام بالنقاش بين هيئة المحلفين بتحسسك إنك عم تحضر حلقة من الاتجاه المعاكس ع قناة الجزيرة ، الفيلم قديم كتير ومتصور بالأبيض والأسود وكلو ع بعضو عم يتمثل بغرفة ومو مدفوع عليه ميتين ليرة بس فيلم عظيم جداً وما بتحس بدقيقة ملل فيه ويُنصح به بشدة ..
اسم الفيلم :
12 Angry Men
النوع : جريمة ، دراما
التقييم : 9
تاريخ إصدار الفيلم : 1957
مدة الفيلم : ساعة و 36 دقيقة
: حالياً رح وقف عمل الفيديوهات لبين ما تقوى الصفحة شوي ، ورح صير نزلكون أفلام ومسلسلات ببوستات عادية ، اذا صار في تفاعل بنرجع عالفيديوهات ..
Be the first to know and let us send you an email when Tartous Cinema posts news and promotions. Your email address will not be used for any other purpose, and you can unsubscribe at any time.
